政壇：社民連籌款人財兩空？
社民連素有「丐幫」之稱，雖然只得主席「長毛」梁國雄一個立法會議員，但已經係社民連嘅「生招牌」，每次遊行示威，都籌到唔少錢。社民連今個星期六將喺旺角一間酒樓搞周年籌款晚會，但由於長毛同副主席黃浩銘早前被控違反旺角清場禁制令，被法庭頒令禁足旺角一帶，如果兩人聽話唔去旺角，就無得出席晚會。不過，如果佢哋違反保釋條件照去，就會被即時收押，唔知佢哋會點做呢？
設計圖片及對白
擬去信裁判官求情
長毛同黃浩銘早前喺旺角彌敦道清場期間被捕，其後被落案起訴一項妨礙公職人員罪名。法庭日前開庭處理眾人保釋申請時，控方要求兩人喺保釋期間，禁止進入花園街以東、登打士街以南、上海街以西同旺角道以北範圍，但黃浩銘就獲批准其中兩日可以去西洋菜街返教會。學生前線核心成員鄭錦滿上星期就因為喺旺角參加「購物」團而違反保釋條件，要即時還押等上法庭。
由於社民連今年繼續喺政界擺酒勝地旺角倫敦大酒樓舉行周年晚宴，而酒樓坐落西洋菜街同山東街交界，咁啱就係喺禁制令範圍之內，所以根據禁制令內容，長毛同黃浩銘唔可以踏足「去飲」範圍。不過，兩人係社民連靈魂人物，加上都有一定「叫座力」同「吸金力」，如果唔可以出席，可能喺籌款方面大打折扣。
社民連副主席吳文遠話原先係喺十一月舉行周年晚會，連訂金都已經畀埋，但係受佔領行動影響，已兩度押後，加上依家佔領行動已完結，亦係時候搞番晚會，唔可以亦唔會再延期喎。而黃浩銘就話會聯同長毛去信裁判官，申請當晚照去旺角參加晚宴，睇吓裁判官批唔批准。
如果裁判官唔批准呢？黃浩銘坦言未諗下一步行動，一切都會見機行事。如果兩人最後真係去唔到，就要靠吳文遠同「阿牛」曾健成獨力支撐大局喇！
