休憩花園曬衣物 康文署縱容
「差唔多成個公園啲圍欄都畀人晾晒被同衫，行樓梯想話扶吓手都唔得。有時啲衫畀風吹跌落地，仲會阻住人行，小朋友喺公園玩耍，踩到跣親就唔好啦！」居民李小姐指葵涌大隴街休憩花園經常見有市民晾曬衣物，不僅有損花園外觀，亦為使用花園的市民造成不便。
有市民於休憩花園晾曬衣物，被指有損市容。
康樂及文化事務署發言人指出，已於花園內張貼告示，提醒市民不得晾曬衣物。康文署職員日常巡查時，亦會即時勸止利用花園設施作晾曬用途的市民，並移走無人看管衣物。發言人又稱，職員曾分別於五月及十一月巡視花園時發現有市民晾曬被鋪，已即時告誡。
對於康文署回應，李小姐坦言只作勸喻將難起嚇阻之效。「淨係話兩句叫佢哋收番埋啲被同衫就算，轉個頭康文署啲人走咗，啲人咪又拎番晒啲嘢出嚟又晾過！」
