不切實際徒添亂 發展農業得啖笑

係咁嘅，港府就新農業政策展開為期三個月嘅公眾諮詢，第一係建議用公帑徵地，設立七十至八十公頃嘅「農業園」，然後按照市值租畀居民耕種，租約期初步定為五年；第二建議成立「農業持續發展基金」，透過資助形式為農業相關嘅科研提供經費，並為推廣本地品牌提供支援。

大家可能會問，點解當局失驚無神話要發展農業？食衞局局長高永文係咁講嘅，隨着香港發展成以服務業為主嘅經濟體，農業日漸萎縮，政府再唔扶持就會進一步式微；而發展農業，既可令本港食品供應多樣化，減輕對進口嘅依賴，亦可為低技術工人提供就業機會，仲可以保護鄉郊景觀喎。

嗱，聽起上來就好吸引嘞，但究竟可唔可行，實在令人懷疑。正如有人話齋，當局重新發展農業，無非想為新界東北發展計劃解圍啫。係人都知，發展新界東北之所以阻力重重，原因之一係有人高舉保育旗幟，反對因為發展而犧牲居民生活方式，家陣政府搞新農業，租地畀居民耕種，擺明想轉移視線喇。

不過，如果港府以為咁就可以封住反對者把口，未免太傻太天真喇。不可不知，新界東北發展計劃除咗有保育問題，亦有政治問題，反新界東北嘅幕後推手係泛民政客，佢哋將問題扯到中港矛盾呢個敏感話題，藉此挑起市民反對情緒，無論港府點樣發展新農業，都係嘥氣嘅啫。再講吖，家陣反對派大玩不合作運動，為拖垮施政無所不用其極，又點會輕易開綠燈吖。

拋開政治阻力唔講，香港根本冇條件發展農業。構思中嘅「農業園」面積細小，即使引進高新科技，都好難形成規模效益，加上飼料、肥料同人工等成本高昂，試問點同內地農產品競爭呢？仲有吖，港府政策自相矛盾，當年鼓勵農戶多養牲畜，點知後來禽流感、豬流感殺到，港府即時變臉下禁令，搞到業界無所適從，見過鬼都怕黑，仲邊肯落疊吖？

所以話啫，發展農業既不切實際，亦無助解決東北發展爭議，反而可能因為收地而引發新一輪反彈。咪話太一叮唔提醒，當局一意孤行，盞添煩添亂，唔衰攞嚟衰嘅咋，叮！