城中鏡：莎莎女婿陳振邦 特訓囝囝學音樂
名人子女，培訓方式都不平凡。好似「莎莎女婿」Davis陳振邦，早前特訓兩歲半大嘅兒子Jacob參加幼兒園舉辦嘅聖誕歌唱表演。除咗陪囝囝上堂，仲播放YouTube影片，教囝囝台風，夠晒認真。
囝囝首次參加音樂表演，陳振邦都肉緊埋一份。
三歲大開始學樂器
Jacob首次登台，爸爸Davis比佢更肉緊。一有時間就陪囝囝練歌，用手機拍下片段再播番畀囝囝睇，檢討有乜地方需要改善。做足準備功夫果然唔同啲，Jacob踏上台板一刻，無腳震、無怯場，表現淡定。睇到呢一幕，喺台下打氣嘅Davis同太太郭詩慧都鬆一口氣。Davis話讀中學時都有參加合唱團，聽見音樂就開心，可惜當年掛住讀書，無時間學樂器，如今囝囝遺傳咗佢嘅音樂細胞，令佢好欣慰。為栽培兒子，幾個月大就送佢去學音樂。到佢三歲大時，仲會學埋樂器添！
用心良苦，莫非希望囝囝成為天王巨星？Davis擰頭話無諗過，笑言只想囝囝有一技之長，將來就算搵唔到食，都可以教琴為生喎，認真識講笑。
