城中鏡：拆禮物日飯敍 媽打雞啄唔斷
唔少名人選擇喺聖誕留港消費，同三五知己食吓飯，一樣可以好滿足。早前拆禮物日（Boxing Day）晚上，喺中環ifc商場見到人稱「媽打」嘅民政事務局前常秘李麗娟同一大班朋友，佢哋啱啱食完晚飯喺食肆門口停留傾偈，好傾到唔捨得走。而騁志發展基金創辦人兼北京殘奧馬術比賽香港選手Nelson葉少康，就忙於幫佢哋影大合照留念，睇見都感受到佢哋開心嘅氣氛。
李麗娟（右二）、葉少康（右一）等人喺食肆門口短聚。
李麗娟（右二）同朋友傾得好開心。
葉少康（左一）揸機，幫李麗娟（右二）等人影相留念。
葉少康巧遇幫影相
當晚媽打同朋友們喺一間中式食肆食完飯後離開，各人意猶未盡，企喺門外繼續談天說地，媽打又不時撩其中一位小朋友玩，眾人停留約五分鐘先至肯講Bye Bye。原來同媽打一齊食飯嘅係佢相識多年嘅舊同學及朋友。
見Nelson掛住幫大家拍照，但自己就冇影埋一份，其實佢冇一齊食飯，呢晚只係約咗媽打其中一位舊同學喺晚飯後飲嘢敍舊，誰知咁啱成班人佢都認識，所以早啲過嚟同大家打招呼。
講起騁志發展基金近況，Nelson話基金成立目的係想培養有遠見嘅年輕人，等佢哋搵到人生目標。佢仲會親自帶年輕人去內地實地考察，或者組織義教團到內地幫貧困學生上堂，亦試過帶年輕人去睇睇阿里巴巴嘅運作模式。Nelson經常中港兩地走，發現內地仲未有傷殘人士駕駛執照，所以都諗緊點樣幫內地殘障人士爭取咁話。
