政壇：搞搞政：博拉打官司訟費百萬計 老嫩唔生性白鴿周身債
佔領行動凸顯咗白鴿黨定位困難嘅問題，佢哋呢頭自命為溫和泛民，嗰頭又愈走愈激，但講到激又唔及人民力量等激進勢力，可以話兩頭唔到岸，變相痛失兩邊支持者。聽講佢哋最近開始嘗到苦果，事關唔少老鴿同乳鴿唔生性，玩抗爭玩到官司纏身，估計淨係打官司費用就數以百萬計，呢啲支出全部由黨埋單。
設計圖片及對白
黨慶籌款失大水喉
包括「AV仁」何俊仁在內嘅一班老鴿喺佔領行動後玩自首、留守博拉，估計佢哋上庭牽涉嘅律師費隨時過百萬元，即使有義務律師捱義氣都唔幫得幾多。啱啱進身常委嘅中西區區議員「峯」鴿許智峯早前亦涉嫌襲擊保安員，聽聞亦狂燒數十萬元訟費。此外，明年區議會選舉殺到埋身，據知白鴿黨預計派出約八十人競逐，如果每人向黨中央伸手攞一、兩萬元，區選經費百幾萬元一定走唔甩，淨係計呢兩條數經已要幾百萬元。
聽聞白鴿黨原定十月舉行嘅黨慶兼籌款晚宴因佔領行動而延期，押後明年二月底舉行，黨主席劉慧卿揚言要趁機搞大佢，仲以籌款六百萬元為目標，比去年多一倍。
但據聞唔少過去願意出面捐錢嘅人，因不滿白鴿黨喺佔領行動中嘅角色，拒絕再科水，令卿姐好頭痛。冇咗大水喉射住，即使晚宴賣枱反應幾好都冇用，籌到嘅錢分分鐘淨係打官司都唔夠。
點知往年搞開嘅元旦遊行又取消咗，冇得借機向市民籌款，而年宵攤位一向都只係當宣傳，講唔上賺錢。因此，除咗籌款晚宴賣畫、賣獎券之外，聽聞該黨上下都正爆頭諗計。其實班白鴿如果識諗就應該管教好班老鴿同乳鴿，人人生性少少，惹少啲官非，咪唔使搞到周身債囉！
