政壇：高達斌擬尖咀起壇論政

愛國陣營經常指摘港台《城市論壇》偏幫泛民主派，兩派不時喺現場擦出火花。愛港之聲主席高達斌話，明年打算每兩周喺尖沙咀鐘樓附近搞周日論壇，邀請唔同政治人物、學者同專家針砭時弊，佢批評《城市論壇》愈嚟愈偏頗，嘉賓嘅意見多數都係一面倒，所以要另起爐灶平衡兩邊聲音，目標係要將鐘樓一帶變成香港人嘅海德公園喎。

高達斌（右）話要搞周日論壇平衡民意。

話會平衡兩方意見

不過，愛港之聲立場鮮明，咁佢哋嘅論壇又點保持中立呢？高達斌話愛港之聲一直都由港人立場出發，唔係中央嘅應聲蟲，亦唔會盲目附和政府嘅施政，總之會平衡兩方意見，唔擔心因此請唔到嘉賓咁話。

另外，愛港之聲將於元旦下午喺遮打花園舉行嘉年華，希望修補因佔領行動造成嘅社會撕裂。高達斌透露，正邀請某位佔領人士到場發表支持佔領嘅原因，但驚對方臨時縮沙，所以暫唔公開對方身份。