話時話，今年全球出現多宗客機失事事件，其中有三單涉及馬來西亞嘅航空公司，令唔少港人一聽到馬來西亞就怕怕。不過，立法會議員Ann蔣麗芸就話最鍾意去馬來西亞嘅檳城，貪呢個小城有種融合東西方文化嘅感覺。

蔣麗芸好鍾意到檳城玩，貪呢個小城有種融合東西方文化嘅感覺。（互聯網圖片）

中英建築夾雜似香港

阿Ann尋日喺社交網站放上多張靚相，仲留言話今年三月去檳城時，剛剛發生馬航客機失聯事件，但仍然無影響佢繼續去馬來西亞嘅興致，因為檳城集合樸實、海洋、綠化同平和嘅感覺，佢覺得好舒服，加上當地既有英式殖民地建築，亦有中式舊樓，好似昔日嘅香港咁話。

佢又話次次去檳城都會掛住香港，事關當地司機一知道佢係香港人，就猛讚香港好。

咁香港有乜嘢好？原來嗰位司機好欣賞香港有港鐵同綜援制度喎，唔似檳城咁話要起地鐵，三十年都仲未起好，更加唔好講話警察好廉潔等優點喇！不過，好同唔好係相對嘅，香港如果只係同檳城比較，咁梗係好好喇！問題係，香港係咪可以更好呢？

第一手消息請下載on.cc東網iPhone/iPad/Android/Windows Phone Apps