政壇：建造業苦肉計抗拉布
除咗發起不合作運動外，泛民主派議員喺今個立法年度，仲「突襲」立法會財務委員會轄下嘅工務小組委員會同人事編制小組委員會，可以主導兩個小組，其中工務小組復會至今，只係通過咗馬鞍山發展計劃撥款。
設計圖片及對白
稱輕則裁員重則結業
早前建造業工會同商會就罕有咁攜手成立大聯盟，要求工務小組委員停止拉布。大聯盟兩個分包商代表，平安夜當日就向工務小組主席「袋巾傑」梁家傑發出聯署信，話拉布輕則搞到裁員，重則隨時結業，唔知袋巾傑點樣拆解呢？
香港機電工程商聯會同香港建造業分包商聯會發出嘅聯署信話，袋巾傑今個月三日同建造業大聯盟見面，十七日又同泛民飯盒會四名議員會面，聽聽工程撥款拉布對建造業苦況，以及對香港經濟負面影響。信中附錄建造業概覽，話依家有三十六萬名從業員、一萬九千間註冊小型工程承建商、一萬多名學生喺大專院校就讀建造業相關課程。
恐減年輕人入行意欲
佢哋話，若果撥款繼續因為拉布而令工程延誤甚至大減，唔少中小企分包商嘅資金流都會面臨不足，影響屬於即時，問題較輕嘅可以考慮裁員，重嘅隨時要結業，令唔少同行回想○三年沙士所引起嘅經濟災難「猶有餘悸」。信件又話工程減少會令接受投標嘅分判商完全冇生意，影響埋工程公司內嘅會計、文書等行業，加上行內一半工友年過五十，拉布會減少年輕人入行意欲，叫工務小組唔好再拉布。
袋巾傑就將矛頭指向政府，話已經向大聯盟解釋，本來佢哋都想調動議程，將民生項目調前盡早通過，不過政府抽起相關議程。佢重申充分明白建造業困境，但都要求佢哋同樣向政府施加壓力，亦會盡力喺財委會平衡，要求通過公務員加薪等民生議程嘅訴求喎。
