病人逼爆急症室 四疫拍門最堪憂
「乍暖還寒時候，最難將息。」呢個聖誕假期陰晴不定，時寒時暖，搞到好多人中招病倒，公立醫院急症室倒瀉籮蟹，醫護人員踢晒腳，加上多種疫症兵臨城下，防疫警報再度響起，大家千祈要保重吖。
呢，話口未完又嚟喇。本港出現入冬以嚟首宗人類感染H7N9禽流感個案，患者係一名年近七旬嘅老婦，早前曾往深圳探訪友人，返港後就感到不適，目前喺屯門醫院深切治療部留醫，情況危殆，需要插喉協助呼吸。
話時話，禽流感一直揮之不去，尤其係依家正值冬季流感高峰期，威脅更加係無處不在。就以最近嚟講吖，繼四川有人中招後，廣州又出現全球第二宗H5N6禽流感人類感染個案，而浙江前晚亦有一名男子被確診患上H7N9禽流感。兩種禽流感病毒同時出現，威脅倍增，加上元旦同農曆新年將至，兩地人流川流不息，稍一鬆懈，隨時失守。仲有吖，除咗殺到埋身嘅禽流感，令人聞之色變嘅新沙士同伊波拉病毒仍然虎視眈眈，四種疫症陰魂不散，令人不寒而慄。
防疫形勢嚴峻，當局點樣應付呢？本報記者日前巡視多處傳播病毒高危地點，發現戒備鬆懈，好似落馬洲管制站，健康監察助理並無要求旅客除帽偵測體溫，而消毒洗手液竟然係「吉樽」。防疫第一線都咁兒戲，其他地方更加可想而知。呢嗱，街市有人徒手挑選活雞，而公立醫院部分升降機按鈕既無貼透明膠紙，亦冇定時消毒，急症室垃圾桶甚至冇冚蓋添。更令人擔心嘅係，公立醫院前線人手不足嘅問題一直未能解決，平時已經捉襟見肘，假如疫潮殺到，防疫戰線隨時崩潰都似。
淨係聖誕節第二日咋，公立醫院急症室求診個案就超過六千一百宗，內科病床更加爆晒棚，平均使用率達百分之一百零七，其中伊利沙伯醫院甚至達到百分之一百二十二，簡直不可思議。大吉利是講句，萬一發生大型突發事件，後果真係不堪設想。
正如古人話齋，弗備難，難必至。公立醫院急症室逼爆，表面睇係假期效應，但講到底係醫管局管理混亂，人手不足造成嘅惡果。咪話太一叮唔提醒吖，家陣香港已經夠亂嘅喇，如果當局再唔打醒十二分精神，加強防疫，萬一好嘅唔靈醜嘅靈，四疫齊齊拍門，沙士悲劇重演，香港隨時萬劫不復o架，叮！
