SUN搞作：網絡小說：朽木之「財」
「多謝財爺嚟我哋《說清說楚》接受訪問。」主持人客套道。鬍鬚曾笑謂︰「我其實係唔清唔楚咁上咗嚟。」主持人即打圓場，「財爺咁識講笑，首先想問吓財爺有咩理財之道，會唔會一字記之曰︰『慳！』」
「死……」鬍鬚曾嚴肅，主持人再試探，「去到死咁嚴重，唔通係魔鬼理財法？」鬍鬚曾三姑六婆上身，「啋，死死聲，我係話四個字︰『慳吹裝等。』慳就唔使講，我守財奴唔係浪得虛名，至於吹呢……」
主持人插嘴，「我知，係咪吹水？個個禮拜做鍵盤戰士打發市民。」鬍鬚曾揮揮手指，「錯！係吹咩！指罵當無到，你哋又奈我乜嘢何？」主持人始料不及，「咁裝……應該係裝腔作勢啦啩，等啲人唔敢獅子開大口。」「都錯！係裝熟，明明唔係中產都要話自己係，再配埋『吹』字訣嚟用，真係一絕！」主持人難以招架，想轉移話題，「財爺不如講吓房屋儲備金。」
「好！房屋儲備金啱啱就符合『等』字，橫掂後生仔有排先上到樓，巧立明目唔用舊錢，等你哋無聲出，你哋慢慢等啦！」
