政壇：搞搞政：東區區選 「雙工」硬碰

年輕幹事挑戰老薑

一二年成立嘅工黨以至其姊妹工會職工盟過往出戰區議會選舉嘅成績麻麻，據講同佢哋專注政治議題、地區工作交白卷有一定關係，不過，今年爆咗佔領行動，李卓人等工黨核心成員更磨爛蓆，留守至最後一刻「博拉」，正所謂打蛇隨棍上，工黨咪計劃由阿Cyd帶領黨內兩位年輕幹事麥德正及曾國輝落戶東區，小試牛刀，屆時，將硬撼工聯會上耀東區議員趙資強（趙Sir）同興東區議員許林慶。趙Sir扎根東區多年，加上工記地區實力亦都唔係省油的燈，工黨借住佔領行動派人出戰公屋選區，可謂注定「送死」，領軍嘅王國興等人真係穩守瞭望台，淡定迎戰可也！

講開工聯會，佢哋喺區議會坐擁三十一席，但下屆委任制取消，佢哋嘅委任區議員要執生搵區出選，據知佢哋計劃明年挑戰民主黨南區黃竹坑選區議員徐遠華，更繼派出小花陳穎欣挑戰馮檢基後，派出個名差唔多讀音嘅小花、即兼任南朗山道熟食市場關注組成員嘅陳榮恩單挑徐遠華，衝擊南區求零的突破。