政壇：高佬賢倡多「種楓」 減人潮
秋冬楓葉紅，吸引唔少賞楓人潮，不過，近年唔使再飛日韓，元朗大棠郊野公園都有得睇，仲成日逼滿晒人添，連附近交通亦十分擠塞。早前立法會議員何俊賢（高佬賢）同陳恒鑌（Ben）約埋去大棠行山兼睇紅葉，兩人不約而同話，既然港人咁鍾意睇紅葉，政府不如喺其他郊野公園種多啲楓樹，市民咪唔使逼得咁辛苦囉！
何俊賢（左）同陳恒鑌（右）行山賞楓，諗到好計。
阿Ben話，香港種楓樹嘅地方唔多，有啲地方只係得一兩棵，營造唔到漫山遍野紅葉嘅浪漫感覺，咁無可避免令有多啲楓樹嘅地方變得擠塞。高佬賢就建議，政府不妨參考外國嘅做法，喺唔同嘅郊野公園種多啲楓樹，一來可以分散人流，二來可以創造新旅遊景點，咁市民就可以去唔同地方賞楓。呢個建議聽落唔錯，但香港天氣愈嚟愈熱，要廣泛種植楓樹唔難，但想楓葉變紅色，似乎唔夠凍，除非啲楓樹有咁高種咁高喇！
