政壇：鄉紳扭計富貴黨閉翳
自由黨（富貴黨）兩位揸弗人黨魁方剛及榮譽主席田北俊（田少）近日趁聖誕忙於湊孫，二人輪任黨魁嘅富貴黨近日卻頻傳內憂外患，既有鄉事派開口嗌退黨，「對家」新民黨更加講明或會向富貴黨撬人，加上田少屬意接班嘅立法會工業界議員林大輝至今仍未決定係咪入黨，接手黨務嘅方剛真係屋漏兼逢連夜雨。最新講法係，就算大輝落戶新界東，北區四鄉嘅票都唔肯入大輝袋，變數多多，二○一五年對富貴黨嚟講真係好多挑戰。
設計圖片及對白
鄉議局建大樓 大輝走數
富貴黨參加立法會直選戰績平平，一二年田少捲土重來，亦全靠新界鄉紳出面畀票先掹車邊入局。不過，隨着田少言退，同田少老友嘅上水鄉事委員會主席侯志強隨即開口考慮退黨，不但令富貴黨頓失鄉紳支持，據知即使田少冧掂大輝入黨，接埋田少棒參選新界東，上水、粉嶺、打鼓嶺同沙頭角北區四鄉都拒撐大輝。
有口痕友透露，鄉議局早年為建新大樓四處撲水，田少就算唔係新界人，都二話不說拍心口捐錢，亦因此獲委任為鄉議局顧問，同鄉紳們親上加親，為田少「抬轎」亦不無道理。
相反，當年同樣有份被揼心口嘅大輝就側側膊「走數」，唔少鄉紳看在眼內，自然唔開心，不滿大輝自稱扎根沙田，講到錢就龜縮，加上佢唔係原居民，幫佢只係人情，因此大輝明年想繼承田少，鄉紳嗰關睇怕唔易過。
至於北區四鄉最終「票」落誰家，有指鄉議局早已被民建聯等政黨瓜分團結力量，鄉紳一六年要搵人參選幾乎勝算無望；撇開富貴黨，睇怕不得不聽候鄉議局主席劉皇發（發叔）發號施令，最大嘅得益者會係邊個政黨，相信大家心裏有數。
