香港地少人多,土地資源缺乏,導致樓價高企,無殼蝸牛望樓興嘆,但奇怪嘅係,港府唔係諗辦法搵地起屋,反而異想天開,話要制訂新農業政策,租地畀農戶耕作喎,問你服未。

係咁嘅,港府聲稱準備推出新農業政策,用公帑喺新界東北收購數十公頃土地,建立「農業園」,然後租畀農戶耕種;另外仲計劃設立發展基金,鼓勵業界投資高增值農產品,以提高本港農業嘅競爭力咁話。聽落呢個宏圖大計直頭冇得頂,隨時可以令農業起死回生,可惜諗深一層,不過得啖笑嘅咋。

係人都知,本港嘅農業早就式微,新農業政策根本不切實際;更何況,本港寸土尺金,成本昂貴,無論搞咩高增值農產品,都冇可能符合經濟效益,最怕變成空中樓閣咋。正如有漁農業界人士話齋,家陣本港無論養豬養魚定種菜種果,都要面對飼料、肥料同人工成本急升嘅壓力,高端農業發展空間有幾大,真係要打個大大嘅問號。

所以話,港產官僚至叻係吹水,當年不斷鼓勵農戶多養牲畜,後來內地供應增加,加上禽流感及豬流感等威脅,港府為咗推卸責任,少做少錯,雞唔畀養,豬又唔畀養,搞到農戶無所適從,好多人意興闌珊,索性收錢走人。依家當局唔知黐咗邊條筋,突然又話要鼓勵發展新農業,你話有冇人信呢?

老實講吖,房屋問題不斷惡化,民怨已經到咗爆煲邊緣,港府再唔諗辦法解決,遲早出事嘅咋。正所謂,好鋼要用在刀刃上,港府該做唔做,應使唔使,有資源唔係用嚟增加土地供應,起公屋幫助無殼蝸牛解決住房問題,反而冇嗰樣整嗰樣,無情白事搞咩新農業,簡直不知所謂。

講開又講,樓價失控,市民怨聲載道,問題根源正正係土地供應不足。現屆政府話就話有意撥亂反正,可惜社會高度政治化,政客處處作梗,拓土建屋阻力重重,搞到要「盲搶地」。家陣當局計劃收購幾十公頃地用嚟種瓜種菜,隨時又會引起市民強烈反彈,你話係咪捉蟲吖。

正所謂,福禍無門,唯人自招。港產官僚罔顧民意,脫離現實,有地唔解決最迫切嘅房屋問題,建屋安民,而係將寶貴嘅土地資源用嚟耕種,九唔搭八,咁搞法,新農業隨時變自作孽o架,叮!

第一手消息請下載on.cc東網iPhone/iPad/Android/Windows Phone Apps