SUN搞作：少膽虫手記：「無」愛真偉大
「唔好，唔好咁大力扑我，腦細……」少膽虫嘅哀求聲響徹《爛果》編輯部。淫賤黎瀕臨失控，「唔得一定要大力扑，扑到你醒為止！」男人最痛，痛徹心扉，仲點會瞓着？「腦細，我醒晒，唔使再扑，『啪啪』聲會嘈住啲同事。」
氣喘如牛嘅淫賤黎終於停低，叼口煙，「呼！呼！少膽虫我真係唔想咁做。」少膽虫雙手後掩，痛楚難當，「腦細，但我見你用支棍扑得我好爽喎……」淫賤黎吐出一圈白煙，「打在你身，痛在我心，我當你係仔，想你好先至會咁樣做。」古有孟母三遷，今有淫黎百扑，同我講為我好，真係當少膽虫傻o架咩？「腦細，做慈母做到你咁偉大，真係少見，但我不過係講咗句想加薪就要打我？」
「你仲後生，要磨練多啲，點可以下下講錢？」淫賤黎扮出一副苦口婆心嘅樣。「咁你就唔可以當畀零用錢個仔o架咩？」少膽虫反將一軍。「見你咁慘，就加畀你啦！」少膽虫估唔到淫賤黎咁爽快。
「不過，加咗舊錢就我幫你儲住先，等你再大啲先畀番你！」淫賤黎笑道。
