政壇：搞搞政：新同盟抽佔中水吸新血
只有百幾名黨員嘅新民主同盟上周日與其「死敵」白鴿黨同日換屆，十二人執委會不乏舊面孔，包括幾名盤據新界東嘅區議員，新同盟尋日特別拉埋新一屆執委同傳媒茶敍。
設計圖片及對白
因應佔領行動吸納咗一批明年起具備選民資格嘅「首投族」，新同盟當然唔放過抽水機會，積極招攬「有背景」嘅年輕人進身執委會，包括學民思潮前成員古俊軒、啱啱先由白鴿黨過檔嘅湯子霈，另一九十後執委陳兆陽更加係中韓混血兒，擺明車馬引入「外國勢力」。不過，陳兆陽樣貌同韓星「都敏俊」金秀賢差好遠喎。
借位寸老鴿戀棧
佢哋唯一嘅立法會議員范國威仲寸爆白鴿黨由立法會議員兼任黨主席，反稱新同盟實行「黨政分家」，黨章規定立法會議員唔可以同時擔任召集人，自言只會留任當然委員，由年輕黨員揸fit咁話。不過，佢似乎無懼泛民因佔領行動被建制派「搶灘」，話支持者「基本盤」冇變，只係兩派支持者兩極化啫，明年區選可望率先派人出戰新界西，首站落戶荃灣小試牛刀。佢仲希望跳出新界東，一六年立法會選舉可以五區插旗，聽落都真係大想頭。
不過，有年輕網民揚言為牽制區議會內七十幾個自動當選嘅建制派而有意出戰，畀網民封為「男神」嘅范國威亦不敢怠慢，直言佢哋由鍵盤戰士轉型為「街頭戰士」，新同盟會特別向佢哋分享選戰經驗，希望佢哋不但牽制建制派，甚至贏埋議席返嚟。唔知「男神」會唔會乘機招攬埋呢班網民入黨呢？
