政壇：俄匯過山車 港商狂嗌驚
話說俄羅斯貨幣盧布近半年大瀉，累計貶值一半，今個星期先略為反彈，好似坐過山車咁，同當地有生意來往嘅港商無不「嗌救命」。同俄國有珠寶生意來往嘅中華廠商聯合會副會長吳宏斌話，俄國市場佔其公司營業額一半，近月訂單驟減，同佢取貨嘅客戶亦紛紛要求延遲付款，影響好大。佢話俄國係新興市場，近十年、八年先至到香港採購，佢亦開始賣紅、藍寶石同鑽石至當地，後來生意愈做愈大，成為佢公司最重要嘅市場。佢希望合作夥伴今次可以大步檻過，否則佢就損失慘重喇！
吳宏斌嘅珠寶生意受盧布貶值重擊，惟有積極面對。
同樣受盧布風暴影響的香港品牌總商會副會長陳曼芝就話，公司一直有為俄羅斯品牌設計同加工，佔整體生意額七成。自從盧布急瀉後，俄商眼見入貨成本大增一倍，訂單月前已應聲下跌，近兩星期仲跌至「零」，跌幅驚人。身邊嘅珠寶商朋友都遭殃，有人面對俄商拖數，都唔知幾時出貨，變相血本無歸，被拖數嘅金額由數十至數百萬元不等，情況慘過沙士。
史立德趁平覓商機
不過，有危自有機，由於當地嘅一線名牌變相六、七折，吸引當地中國留學生排隊搶購轉手賺錢。廠商會常董史立德話內地人工愈來愈貴，請人又困難，若然俄國生產成本大降，或考慮到當地開紙品廠。賣電器去俄國多年嘅德國寶董事長陳國民就話，佢早已要求俄國拍檔買貨要以美金找數，咁就唔怕盧布大波動嘞！
