政壇:麥美娟感染病毒要留院
由於係聖誕假期,立法會就算疲於奔命應付「拉布」,都要年尾「收爐」抖抖,但立法會議員Alice麥美娟不但有病冇得抖,仲因不停開會而延誤治療過濾性病毒感染,搞到喉嚨同口都損晒,莫講話食嘢,連講嘢都成問題,最終要留院觀察三日,冬至都要喺醫院度過,可謂相當「難忘」。
麥美娟因病毒感染而要入院過冬至,仲要吊鹽水。(受訪者提供)
麥美娟
吊鹽水三日減三磅
趕得切聖誕前出院嘅Alice透露,原本月初已經有感染徵狀,但食完藥就好番所以未有理會;直至上周三立法會最後一次召開大會又再作病,但為應付連日會議而延誤治療,結果醫生形容佢喉嚨已爛晒,打針食藥都唔掂,要留院治療。
曾經自嘲「盛女」嘅Alice,雖然今年未有男伴,但佢原定平安夜陪父親赴澳門出席喜宴,都因為病毒突襲而取消。不過,Alice因為喉嚨吞唔到嘢食而要吊鹽水代替進食,唯一好處係住院三日已經減重三磅,佢笑言呢個可能係今次入院唯一好處喎,認真阿Q。