喺尋日開始退休前休假嘅懲教署前署長單日堅，其辦公室嘅物品已喺聖誕前收拾得七七八八。日前去到佢辦公室，見到除咗少量文件之外，就只係剩低部分相片同擺設。單日堅拎起窗旁一對圓圓嘅仙人掌，話擺放呢對植物喺辦公室原來都有特別含意，皆因仙人掌有好多刺針，寓意有啲嘢係唔可以亂掂，一觸碰就要付出代價。

單日堅話在辦公室擺放仙人掌，寓意有啲嘢唔可以亂碰。

一對仙人掌中間仲擺放咗一幅古代傳說中能打鬼驅邪嘅鍾馗畫像，氣勢加倍。講到一定要帶走嘅物品，單日堅二話不說即刻拎起一個細小嘅外置硬碟，事關佢話入面儲存嘅係佢多年嚟嘅珍貴照片，包括由細到大嘅相片，仲有與同事嘅開心合照，真係有錢都買唔番。

職業病常用命令句

服務懲教署足足三十五年，單日堅笑言梗會有少少職業病，有時返到屋企對住老婆仔女，都會不自覺咁用咗命令式語句，好似「你過嚟呢邊！」等等，聽者可能覺得唔多舒服，但相信退休後應該可以變得溫柔啲喇！

第一手消息請下載on.cc東網iPhone/iPad/Android/Windows Phone Apps