政壇：食力簡幼子出征選村長
君子報仇十年未晚，尤其係含住一啖怨氣，力量更加不容忽視。上水鄉委會前主席「食力簡」簡炳墀自從上次賄選要受牢獄之苦後，一直低調，連馬場都唔多見佢嘅蹤影。不過，有名畀你叫做食力簡，當然唔會咁易收山唔玩啦。下月全港幾百條村將舉行鄉郊村代表選舉，佢細仔簡永輝決定代父從軍，出選松柏塱村原居民村長，即係當年老竇發圍彈起嗰條村，睇落似乎有暗湧。
設計圖片及對白
預計呢場仗應該唔易打，事關今次竟有五人角逐，除咗簡永輝外，仲有黃偉業、劉應和、李漢樑、簡偉文，激烈程度較以往有過之而無不及。大家可能會諗，點解連一條村村長都要爭崩頭呢？其實村長擁有好大權，千祈唔可以睇小。如果係原居民村長，就可以決定邊個屬於該條村嘅原居民，即係決定邊個擁有丁權。而且做咗村長，仲可以角逐上水鄉委會主席。當年食力簡就係先做松柏塱村村長，再贏埋上水鄉委會主席，先開始活躍政壇。今次食力簡可唔可以靠阿仔威番次，好快就知道喇！
侯強自爆「搞番佢」
如果簡永輝贏咗，明年分分鐘會打蛇隨棍上參選上水鄉事委員會，咁咪同現任上水鄉委會主席、有「上水皇帝」稱號嘅「侯強」侯志強打對台？霸氣十足嘅侯強話一早知道簡永輝想選，仲話已派人同佢對撼。最後佢爆咗一句：「佢搞我，我咪搞番佢囉！」不過，侯強都有難關要過，呢次唔係美人關，而係要連任河上鄉村長，如果佢落選，就唔使諗其他嘢嘞！
村代表選舉明年一月舉行，另一焦點當然落喺「新界王」劉皇發身上，佢已報名參選爭取連任龍鼓灘村長，打算做足村長五十幾年。以為無對手啦，今年又出奇地殺出一位叫劉威平嘅原居民，但據聞只係煙幕，發叔依然實食無黐牙，難怪佢可以一直稱霸新界鄉議局。
