吸引港二代回流 最怕無用武之地
問大家一個問題，廿一世紀最寶貴嘅資源係乜？冇錯嘞，答案就係人才。人才就好似種子咁，只要有適合嘅土壤及環境，就可以茁壯成長，開花結果。可惜吖，香港發展停滯不前，競爭力每況愈下，加上政治爭拗不斷，社會愈來愈激進，完全唔適合種子生長，想吸引人才？好難咯。
呢，港府近年計劃多多，一時推出優秀人才入境計劃，一時又搞輸入內地人才計劃，結果反應麻麻，效果欠佳。有見及此，當局將目標轉向港人喺海外嘅第二代甚至第三代，有意簡化程序，吸引佢哋回流香港發展喎。
當局如意算盤係咁打嘅，港人海外子女起碼有幾十萬之多，當中不乏具高學歷同專業技能嘅人才，而且好多都識講廣東話，熟悉香港文化，容易適應本港生活，如果回流發展，可以講係相得益彰。不過咁，由於當中好多人冇香港居留權，要返港工作，就要好似其他外籍人士咁，透過現行入境政策申請來港，冇任何優惠，費時失事。所以咯喎，港府計劃大幅放寬港人海外子女來港工作申請，以增加吸引力，有關細節明年初施政報告會有正式公布。
即係咁，科技時代最需要嘅係人才，有人才就代表有競爭力，港府有意吸引港人海外子女回流發展，無疑有諗頭，問題係，人才最關心嘅係有冇發展空間，如果無用武之地，就算手續簡化到簽個名就得，都係嘥氣嘅咋。好似輸入內地人才計劃咁吖，話就話吸引咗唔少內地精英，可惜本港發展空間有限，根本留唔住人才，計劃最終變成內地人移民海外嘅跳板。更搞笑嘅係，前朝貪曾政府將雙非兒童當成本港人口生力軍，卒之搞到七國咁亂，港人怨聲載道，如果唔係現屆政府果斷叫停，唔知仲會搞出乜嘢大頭佛添吖。
所以話，要吸引人才，首先要解決自己嘅問題。係人都知，香港產業結構單一，唔係金融就係地產，好多人才無用武之地，最後唔係被迫轉行，就係轉到外國發展。再講吖，香港社會愈來愈政治化，家嘈屋閉，永無寧日，淨係一場佔領行動就嚇怕唔少人喇，咁又點樣吸引人才呢？
嗱，唔係太一叮潑冷水，如果香港繼續只講政治，唔講發展，必定不斷沉淪，喺咁嘅情況下，就算有海外港二代肯回流，都只會係虛耗光陰，意興闌珊嘅咋，叮！
