呢個聖誕節，你同邊個一齊慶祝？去邊度玩？唔同人有唔同嘅選擇，而玩具大王蔡志明同家人就選擇與員工一齊慶祝嘞！

蔡志明全家總動員，喺平安夜開派對倒數迎聖誕。

今年改喺西貢嘅酒店舉行聖誕派對，好有新鮮感。

蔡太（中）喺席間同員工祝酒。

蔡志明同太太蔡李惠莉、兩個女加怡同老公陳漢驄、加敏同老公馬鴻銘、細仔加讚同老婆汪圓圓，仲有姪仔蔡加頌同老婆盧靜賢等，前晚就齊齊喺西貢嘅酒店舉行聖誕Party，宴請一百五十名員工及好友喺平安夜倒數迎聖誕。蔡生話：「間酒店買咗半年，仲未改名，遲啲先，依家未開業，平時係close嘅。酒店有五層高，我同屋企人或者朋友出海嗰時都會嚟坐一坐。」

私家酒店 與眾同樂

咁呢間酒店係咪私人度假屋？佢話：「係大型度假屋。至於投資咗幾多錢就唔講得嘞，因為太多人想買喇，我買完之後都有大把人問，想我賣。」咁佢買親都係一幢幢喎，但佢話呢啲好細幢啫！

蔡生又話舉行聖誕Party不知不覺已有十幾年，因為聖誕節雖然有假期，但假期又唔多，唔會出埠旅行，所以會舉行聖誕Party慶祝，佢又話：「以往多數都係喺屋企搞，今年轉吓地方，喺呢度搞有新鮮感。」而蔡太就大讚酒店嘅景色優美，佢話：「呢度環境好好，日頭嘅環境都好靚，有海景，好似坐郵輪咁。今晚天氣好好，好溫暖。喺香港過聖誕最有氣氛。」

第一手消息請下載on.cc東網iPhone/iPad/Android/Windows Phone Apps