大搜查：舖租飆五成逼設另類倉

「啲貨原本放喺另一間舖頭嗰度，不過三個月前因為業主要加租五成，便冇再租，諗住用自己架貨車嚟擺貨。」開業六年的金邊粉泰菜負責人南先生大吐苦水，直言此做法也是迫不得已，「我諗住求個方便，只係暫時性質，無諗過會惹人非議。」

「間舖頭只有七百幾平方呎，廚房連埋樓面，根本就無乜地方可以擺到咁多貨，就算之前租咗附近一個一百平方呎嘅舖位，只啱啱夠擺晒所有貨品。唔夠位唔通將啲貨擺喺街咩？咁咪仲唔衞生！依家每日都有入錶，到夜晚就會駕車離開錶位，到附近停車場夜泊，所以唔覺得會影響到道路使用者或其他人。」

至於從店舖接駁電線至「貨倉」的行為，南先生承認是早前自行設置，但他認為那是符合安全標準。