政壇：搞搞政：人力（目及）到實 白鴿黨政改取態
白鴿黨同民協喺四年前政改一役中「轉軚」支持政改方案，結果被激進泛民政團人民力量隨後喺區議會同立法會選舉發起「票債票償」運動，派人狙擊白鴿黨同民協候選人，令建制派坐享漁人之利。
設計圖片及對白
事隔四年，下屆區議會選舉喺明年底舉行，正當各政團積極喺各區插旗之際，人力亦都諗緊區選策略，當中首要考慮嘅就係再派唔派人落區狙擊白鴿黨。經過一番討論之後，據聞大家認為由於白鴿黨已簽咗政改承諾書，表明反對任何有篩選嘅政改方案，同人力立場一致。正因為白鴿黨有咗呢道政改「護身符」或「擋箭牌」，加上泛民主派喺佔領行動一役後元氣大傷，人力於是決定暫時唔派人狙擊白鴿黨，費事被人話佢哋一時一樣。
不過，有人力中人話，由於白鴿黨有反口覆舌前科，人力都要等到立法會否決政改方案後，先至可以確定唔會狙擊白鴿黨，如果白鴿黨再好似上屆咁臨時轉軚撐政改，佢哋一定會出盡全力狙擊，甚至要白鴿黨亡黨都在所不計喎。
另外，佔領行動催生大批泛民主派嘅「雨傘仔女」，有人力成員話雖然呢班「雨傘仔女」唔多鍾意政黨，但由於佢哋形象清新，加上有網民近日高調話要參選區議會，挑戰每屆都係靠自動當選食胡嘅建制派議員，人力正打算接觸呢班生力軍，以佢哋參選區議會嘅經驗教佢哋點參選，希望可以幫人力吸納新一批支持者喎。
