冬季流感殺到，屯門、瑪嘉烈同伊利沙伯等多間公立醫院內科病房已爆棚。為咗紓緩呢個情況，醫院管理局行政總裁梁栢賢早前宣布推出多項應變措施，包括下月起加近三百張病床，又向加班嘅醫護人員發放特別津貼，同埋增加聖誕同新年期間普通科門診名額，以應付求診人潮，梁栢賢都算吸取咗教訓，今次提早準備，不過，呢啲都只係臨時措施，但醫療服務不足嘅問題仍待解決，睇怕梁栢賢要戙高床板諗橋嘞！
