政壇：吳秋北保普選任務未完
持續兩個半月嘅佔領行動經已落幕，為咗抗衡佔中而成立嘅保普選反佔中大聯盟，終於可以抖番啖氣。早前我哋喺一個活動上見到身兼大聯盟發言人嘅工聯會理事長吳秋北，問佢大聯盟完成咗咁重要嘅任務，咪可以解散？佢就笑笑口話未解散得住，雖然佔領清咗場，但係保普選任務仍未完成，嚟緊政府推出第二輪政改諮詢後仲要積極表達意見。
吳秋北話冇得休息，想出埠都係去吓澳門或內地玩幾日就算。
吳秋北話大聯盟個名講到明除咗反佔中，仲要保普選，香港仍未有普選，所以要繼續努力爭取咁話。過去幾個月，大聯盟發起兩次大簽名同一次大遊行，吳秋北都忙到飛起，依家應該可以好好休息。點知佢話仲係冇得休息，因為仲有好多勞工權益要爭取，例如勞工假期與公眾假期睇齊、標準工時等等。所以就算想出埠玩，都係去吓澳門、內地玩幾日就算喎。
