政壇：博愛夜宴重現上海灘盛況
博愛醫院早前舉行慈善餐舞會，為旗下中西醫療、教育及社會服務籌款。博愛董事局主席何榮添、候任主席兼餐舞會籌委會主席Winnie譚姜美珠一早到場招呼賓客。何榮添話今年經濟環境一般，令籌款工作唔係咁容易，幸好仍有唔少善長支持，善款成績總算達標。
譚姜美珠（中）、博愛總理林群（左）同楊宇思盛裝重現上海灘風韻。
梁天富要「留班」做總理，太太大表支持。
當晚餐舞會主題係「上海之夜」，賓客莫不悉心打扮一番，重現上海灘衣香鬢影嘅盛況。表演嘉賓小提琴家楊宇思仲自備一把油紙傘做配襯，倍添古雅氣氛。博愛前主席林建康同太太林黃寧艷亦有到場，林太全家聖誕節會喺倫敦度過，事關佢哋喺倫敦有間屋，時不時都要過去住吓。林太事前仲做過功課，知道海德公園有聖誕派對，所以到時兩名寶貝兒子可以玩得盡興啲喇！
博愛總理梁天富都有到場，佢已做咗九年總理，但一直堅持唔升呢做主席。問佢點解？佢笑稱，做咗善團主席後就冇得留低在董事局做善事，加上自己生意太忙，所以咪永不升班囉！
Winnie明年將接棒做主席，預咗有排忙。佢同家人移居澳洲經已二十七年，至今仍然澳港兩邊走，事關佢喺當地仍有大屋，女兒及孫仔亦喺墨爾本定居。早前澳洲發生震驚全球嘅挾持人質流血事件，Winnie覺得好驚訝，但直言冇得提防，事關澳洲政治氣氛一向好平和，相信今次事件只係個案咁話。
