政壇：樹根鬧港台燙手山「薯」
雖然立法會議員鍾樹根周不時都講錯嘢，但就因為咁帶畀大家好多歡樂，佢尋日出席電台節目時又爆佳句。話說身兼立法會資訊科技及廣播事務委員會成員嘅樹根鬧爆港台，細數港台管理不善兼大花筒，唔怪得廣播處處長公開招聘半年來，都未有人想做，因為個位係燙手山「薯」喎！樹根失驚無神將山芋變成山薯，難為三位電台主持人都忍住唔笑呀！
設計圖片及對白
網站留言「ATV進步維谷」
咁仲未夠，樹根做完節目後，就將訪問錄音擺上網站分享，仲留言話「ATV進步維谷」，事關佢喺訪問中講咗唔少亞視欠薪及續牌危機。不過，今次樹根又再寫錯字，將進退維谷變成進步維谷，隨即引起網民一陣嘲笑，有人話佢如果證實有讀寫障礙，大家就唔好再笑佢喎。
樹根咁失魂，可能係被港台數極都數唔晒嘅問題激親。佢話港台數碼廣播定位唔清晰，佢認為做電台就應該做番電台嘅嘢，但係港台就執意要搞電腦儲存中心，佢建議港台可將珍貴嘅菲林或膠卷寄放喺電影資料館，將來要用隨時拎番出嚟咪得囉，又或者去租外面地方，又平又正。但港台一方就反駁話，儲存啲嘢喺人哋度都有版權問題。跟住樹根愈講愈嬲，話咁講係蝦佢唔識嘢喎，因為人哋唔可以隨便攞出嚟播嘛！
話無人夠膽做處長
佢話曾經去港台睇過，港台人猛呻邊度啲渠位爆咗、張櫈又爛，地方好逼唔夠用，但係佢覺得呢啲係管理問題，唔係空間問題。好似商台地方差唔多大，又唔見有港台咁多難題，所以樹根當時都冇批准港台更換設施或設備。
講到廣播處處長冇人想做，樹根直言，港台有部分管理權交咗畀工會，但係工會郁啲就話妨礙編採自由，令行政上有好多掣肘。佢又批評港台以公帑營運，但就變成反政府喉舌，港台如果繼續係咁，邊個夠膽做處長呢？
