香港郵政玩卸膊 滋擾傳媒欠交代
避得過初一，避唔過十五。香港郵政涉嫌違法滋擾東方報業集團事件，當局煞有介事成立專案組調查，一拖再拖之下，話就話已「完成內部調查」，但當局對事件既冇交代，又冇道歉，淨係將個波踢畀警方就算數，簡直豈有此理。香港郵政遮遮掩掩，到底有乜難言之隱？
件事係咁嘅，東方報業十月三十日收到一封已寄出兩個月、疑因地址有誤而被退回嘅公文袋郵件，公文袋被人拆開，內藏九封同日寄出嘅郵件，其中一封更被人開封後再以膠紙封口。事件撲朔迷離，匪夷所思，東方報業立即向香港郵政投訴，同時報警處理。其後香港郵政曾派人來報館調查，但就一直無聲無息，近日至回覆指完成內部調查喎。
嗱，內部調查拖咗個幾兩個月已經冇理由，更離譜係香港郵政嘅回覆九唔搭八，淨係話事件涉及多個處理環節，有一定難度，需要較長時間，又話已經交畀警方調查，現階段不宜披露具體內容喎。咁即係點吖？擺明搵警方做擋箭牌，卸得就卸啫。
正如有立法會議員話齋，事件反映香港郵政內部管理同營運都有問題，呢次斷正，最起碼都要向東方報業道歉，講句對唔住吖。有學者更直指香港郵政敷衍塞責，好似將個波交咗畀警方咁，自己就唔使負責同交代。
冇錯嘞，香港郵政鬼鬼祟祟，拒絕交代，背後一定有蠱惑。好簡單，佢哋將事件交畀警方調查，表示性質嚴重，可能涉及刑事成分，點可以不了了之o架。係人都睇得出，今次事件唔係普通郵誤或者有人擺烏龍咁簡單，亦唔係只涉及刑事罪行同侵犯私隱，而係針對正義傳媒嘅惡意滋擾同政治打壓，如果唔查個水落石出，新聞自由及言論自由蕩然無存，香港只會暗無天日嘅咋。
講開又講吖，東方報業受到當局惡意滋擾早就罄竹難書嘅喇。從回歸前到回歸後一直冇停止過，政府部門以各種莫須有嘅藉口輪流上門滋擾，依家連香港郵政亦淪為政治打手，簡直無所不用其極。欲加之罪，何患無詞，唔知下次又輪到邊個部門出手呢？
所以話，國之將亡，必有妖孽。今時今日反對派氣燄囂張，興風作浪，搞到香港七國咁亂，政府唔去撥亂反正，反而絞盡腦汁滋擾正義傳媒，導致天怒人怨，眾叛親離，你話係咪自取滅亡吖？叮！
