政壇：搞搞政：高永文 張炳良趕搭立會尾班車
政府幾個決策局近日急推多項政策，包括食衞局局長高永文喺銅鑼灣清場後翌日，立即公布終極自願醫保方案諮詢公眾，隔日又輪到運輸及房屋局局長張炳良公布自九八年以來首份長遠房屋策略報告等，唔少人認為係要轉移市民視線，以民生政策冚政治話題，但決策局中人就嗌救命，並指唔少政策早於佔領行動前已有定案，但被佔領行動拖住，為免拖拖吓到咗明年，又同政改第二階段諮詢撞期，咪急急趕尾班車囉。
設計圖片及對白
佔領行動持續逾兩個月，行政、立法兩個多月來可以話瀕於空轉狀態，清場完畢，各決策局咪即刻響應成熟一項、推出一項嘅方針囉。按原定計劃，多個決策局應該喺過去兩個月推出若干諮詢報告，可惜佔領行動期間，社會氣氛空前焦慮，既不利推出重大政策，亦唔會獲認真討論。
所以佔領行動結束後，各局咪拿拿聲「大清倉」。唔止政府開快車做嘢，立會都要趕功課，事關立會因佔「鐘」及大樓遭到示威者衝擊，而被迫多次取消會議，依家大家鬥還債，市民咪感覺逼爆煲囉。
