沙田馬場尋日舉行東華三院盃賽，持續兩個半月嘅佔領行動落幕，東華三院主席施榮恆（Ivan）話，事件完結後，旗下社會企業生意回升，自己得閒又可以行街購物，交通仲冇之前咁塞添，梗係開心喇！Ivan嘅主席任期已過咗三分之二，佢認為成績尚算唔錯，譬如完成咗上任時講過一定要做嘅事，就係將總理要在四年內升呢做副主席，否則就要退出董事局嘅期限，成功延長至五年。Ivan亦賣口乖話，做主席呢段時間好忙，為免太太詐型，落莊後都要抽時間陪下太太同小朋友。

施榮恆夫婦（左起）、東華總理鄧明慧及文穎怡齊入馬場輕鬆吓。

東華總理廖偉麟及表妹兼仁濟醫院總理湯振玲（Jacqueline）都入場玩，記者見Jacqueline同東華總理楊嘉成好啱傾，原來兩人都係運動愛好者。Jacqueline一向好鍾意踩單車，仲周圍去征戰，不過佢笑笑口話，最近想跟楊嘉成學跑馬拉松，事關女仔唔應該踩咁多單車，因為會踩粗隻腳喎！

醫院管理局主席梁智仁同太太梁許安璞（Annie）亦有到場，近排香港勁吹韓風，一向煮嘢好耍家嘅Annie都唔執輸，不過就唔係貪靚嗰種，而係醉心鑽研韓國食譜，特別係石頭鍋飯。Annie煮嘅石頭鍋飯有一個好特別嘅心思，就係用可用廚餘做材料，符合佢着重環保同健康嘅烹飪原則，睇嚟梁智仁可以大飽口福喇！

第一手消息請下載on.cc東網iPhone/iPad/Android/Windows Phone Apps