政壇：反佔中不力 商會主席落台

其實呢位原主席反佔中立場都算鮮明，曾多次以商會名義登報支持警方執法，唯獨佢早前聯同多名商會代表到南洋出席一個行業研討會時，其致辭有同情香港年輕人嘅內容，冇「畫公仔畫出腸」咁嚴詞譴責佔領行動。事後據講隨即有人向北京告御狀，其後更有人借題發揮，暗地游說其他會董喺改選時，向呢位疑似冇緊跟中央立場嘅原主席施以「小懲大戒」，令其冇得高票連任咁風光。

投票結果一出，原主席居然以兩票之差意外落選，當選嘅當然就係有份興波作浪嘅人。聽聞有不值呢種做法的旁觀者，激動到當場喊咗出來。多名被人誤導、最終「小懲」變咗「死刑」嘅會董亦都當場O晒嘴，真係始料不及。