政壇：鄉紳拉隊走 富貴黨頭痕
政壇風起雲湧，被謔稱「富貴黨」嘅自由黨正值多事之秋，繼前黨魁田北俊（田少）因失言而被迫退居榮譽主席、由黨友方剛接棒，工業界林大輝入主富貴黨又遲遲未有消息，據知連該黨喺新界其中一大勢力，即上水鄉事委員會主席侯志強都萌生退意，呢次係咪草裙舞？好難講，但侯志強就話到明：「要走嘅話，鄉紳一定共同進退。」睇怕方剛同田少呢鋪都好頭痕。
設計圖片及對白
其實，富貴黨一向唔擅長打直選戰，○八年田少同周梁淑怡出戰立法會，雙雙敗北，據傳死因之一就係未獲新界鄉紳支持，因此田少一二年再戰新界東時，就積極羅致侯志強入黨，希望借侯志強喺新界東嘅人脈同影響力為佢力保一席，最終如願。
立會選舉隨時失逾萬票
我哋問過侯志強，佢直認不諱有意退黨，又坦言當初入黨全因同田少老友，甚少參與黨務亦好耐冇開會，連自己係黨中委都唔知，依家田少退咗落嚟，佢留低更加冇意思。侯志強仲話富貴黨來來去去都係靠幾個明星保住議席，地區工作就經常交白卷，鄉紳好難撐啫。佢又笑言，已經年過五十，若有「有心人」想接棒出任上水鄉委會主席，佢無任歡迎，仲話好想快啲退休，已經無心戀戰咁話。
據知當年加入自由黨嘅鄉紳唔算多，喺區議會層面有票嘅只有佢同上水區議員兼上水鄉委會執委廖國華，但田少一直有意將新界東議席過繼畀大輝，依家大輝去向未明，侯志強又突然萌生退意，一六年立法會選舉分分鐘喺自由黨帶走逾萬票，屆時就算田少為自由黨捱義氣參選，議席亦未必十拿九穩。
