加快減慢惹民怨 縱容油魔官之過
「油魔」出沒注意！最近國際油價持續插水，由高峰期嘅百幾美元一桶跌穿六十美元大關，但奇怪嘅係，本港零售價淨係減得雞碎咁多，你話係咪離譜吖？唔怪得運輸業界怨聲載道喇。
講多無謂，數字最實際。有工會比較過去三年本港入口油價同零售價，發現入口產品價格下跌最少兩成，但同期油產品零售價只係略減幾個巴仙，有啲甚至不跌反升添。正如有立法會議員話齋，政府應該負起監察責任，敦促油公司按國際油價跌幅減價。話時話，《競爭條例》出年將會正式實施，當局係時候查吓有冇人違反競爭行為啦。
冇錯嘞，油價加快減慢，運輸業界賺埋賺埋唔夠進貢油魔，叫苦連天唔在講，最慘係公共交通機構成日以油價貴為藉口加票價，搞到你加佢又加，形成骨牌效應，最終受害嘅又係小市民。
係人都知，油魔之所以有恃無恐，皆因市場長期由少數油公司壟斷，佢哋喺燃油價格上形成「攻守同盟」，再加上港府監管不力，放任自流，搞到業界要發起「餓死油魔」嘅自救行動。消委會話就話會定期追蹤油價走勢，問題係佢哋無執法權，只係無牙老虎咋，油公司賺錢至上，睬你都傻啦。
所以話啫，要將油魔關入籠，始終要港府出手至掂。有人建議當局設立委員會，由學者、運輸業界、官員同油公司代表參與，定出調價機制，令定價更加合理；亦有人建議港府效法外國做法，將油產品當作戰略物資，積極干預。可惜吖，市民急政府唔急，一味以「自由市場」做擋箭牌，卸得就卸，最多只係耍吓花拳繡腿，例如喺網上公布油價資料，等車主自己揀去邊度入油，就當交咗差，姿勢多過實際，油公司完全冇有怕，仲唔撳住搶咩。
講真，要打殘油魔唔係話冇可能，問題係港府有冇決心嘅啫。呢，好似車用石油氣咁吖，由於受合約規限，加上有「每月一調」機制，價格波幅就貼市得多嘞，今年以來車用石油氣平均減咗四成，基本上同國際石油氣價格減幅相若。既然車用石油氣做得到，點解汽油同柴油做唔到呢？
正所謂，民生無小事，油價問題牽一髮動全身，好多行業受影響，絕對唔係小事o架。咪話太一叮唔警告，港府繼續坐視油魔肆虐，下次唔係「餓死油魔」咁簡單，而係「餓死廢官」呀，叮！
