城中鏡：于正人買A股 即換新車
滬港通日前剛通車滿一個月，近月A股狂牛勁升，食正升浪真係賺到笑。瑞銀亞洲股票衍生產品銷售部董事總經理Johnny于正人呢排笑容滿面，原來佢一早都買咗A股ETF（交易所買賣基金），早前只係沽咗四分一貨仔，已經夠佢換架新車呀！
于正人
Johnny講窩輪講牛熊證大家聽得多，原來投資都有一手。雖然因工作關係，佢唔可以買窩輪牛熊證，但買跟住大市走既ETF，睇得啱都可以賺好多。佢尋日就自爆啱啱換咗部新車，由保時捷轉為寶馬M3，而部新車係佢放咗部分A股ETF賺番嚟，可以話提早送份聖誕禮物畀自己。
佢又話嗰四分一貨仔其實都放早咗，如果持有到依家，會賺更多。A股喺好短時間升咗三成，即係投資100萬就會賺30萬，所以買中會賺錢，唔係好難，重點係唔好走得太快。依家剩番四分三貨仔，佢就話等到全民皆股時先清貨。
其實，Johnny返埋今朝早就會放個悠長假期，先去上海，再到東京玩，粉絲們要到明年先再見到佢喇！
