水係寶貴嘅資源,必須珍惜。國際青年商會香港總會日前舉行十大傑出青年選舉頒獎典禮晚宴,多位得獎者從事家電、設計等與環保息息相關的行業,包括德國寶董事、香港工業總會青委主席Karen陳嘉賢同本地室內設計師Ajax羅靈傑,佢哋都好有先見之明,每日實踐緊節約用水嘅生活之道。

余遠騁沖涼只需五至六分鐘,還要向兩分鐘目標進發。

戴3D打印眼鏡嘅羅靈傑(左)與太太悉心打扮出席頒獎禮。

陳嘉賢(右)同高鼎國(左)齊齊榮膺本年度十大傑青。

見世界綠色組織創辦人及行政總裁余遠騁都有出席支持活動,佢話自己頭髮長咗,影響沖涼速度,所以為咗盡量慳水,差唔多係時候要去剪髮喎,又話每日沖涼平均只用大約五至六分鐘。不過,大家毋須驚訝,事關佢大爆環境局局長黃錦星同副局長陸恭蕙都只係沖涼兩分鐘,皆因佢哋頭髮夠短,加上軍訓都係用呢個速度沖涼,所以佢要向呢個目標進發。

即熱式熱水爐較慳電

至於Ajax亦係環保分子,除咗室內設計時要考慮環保元素,家中亦用咗自動感應燈,洗完手嘅水則可直接流入坐廁水廂再用,為環保出分力。另外,當晚佢戴住嘅眼鏡非常特別,係購自巴黎嘅3D打印眼鏡,佢話現時唔單止飾物開始使用3D列印技術,連成間屋都可以用水泥混合其他物料列印出來,亦係家具將來發展新趨勢。

得獎嘅仲有香港鐘錶業總會主席高鼎國、港大醫學院助理院長曾詠恆同Karen等。講到環保,Karen當然有唔少心得,佢話好多人對節約水電嘅概念有誤,例如即熱式熱水爐驟眼看用電量好大,但由於耗電時間比預熱式熱水爐短,所以慳電好多。佢仲話沖涼時選用面積較大,但出水孔偏疏和細花灑頭,感覺一樣舒服,但就慳水得多。

第一手消息請下載on.cc東網iPhone/iPad/Android/Windows Phone Apps