北風凜冽,寒冷乾燥,皮膚爆坼,傷口難愈,天氣愈凍,裂紋愈深,痛到飛起!

香港現實生態,也受着北風吹襲,燥底的表皮,更易撕裂,傷痕闊大,沒人懂得治理不特止,仲有賤精從旁撥火,加油添柴,火勢熊熊,僅餘一點水分也燒光,裂縫見骨!

北風算是季節性產物,各人自備保濕潤膚露,或許頂得過一段時間,難關遠去便是!但當呢個社會,像患上癲癇症般「發羊吊」,咁就手尾長,或不能斷尾也!

癲癇症發作,會全身抽搐打顫,吐白沫,甚至失去理性或知覺。

家陣香港,縱使未曾完全失去知覺,也正打冷震嘔緊白泡,無藥醫治!

癲癇症有分「先天」和「後天」的。

「先天」,是父母「稟賦不足」所致,即精卵未結合,其基因已早有問題,勉強成孕,後果堪虞!中英兩國文化質素極端,生個香港咁嘅胎兒出嚟,點會唔多事吖?

「後天」,係腦部損毀,被重擊或撼撞,皆能導致發羊吊的!香港近十七年來,慘遭各敗類們連番毒手,仲係兜頭扑嗰隻,唔瞓地抽搐顫抖就有鬼矣!

至今,癲癇症仍未有斷尾根治之法,但奇怪的地方,就係患者一輪辛苦「掙扎」後,會逐漸紓緩,以致「復原」,神奇地「醒後如常人」,一切安好,只要調養得宜,雖久不久發病,但也可時間相隔長一點!

香港患的重症,恰恰如癲癇,不斷尾,久不久發作,更可怕的係已習慣到病愈「醒後如常人」,一切麻木得變常態兼全盤接受,唔死便還得神落!咁咪做無奈的爆晒坼嘅北風下鵪鶉囉!

彭志銘

次文化考古學家,對城中潮語有深入研究,博徵博引,廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps