政壇：搞搞政：霍啟剛楊立門傳掌青年政策

佔領行動刺激當局

青年事務委員會同公民教育委員會依家分別由觀塘區議會主席陳振彬同和富大埔足球隊會長李宗德執掌，由於兩人年紀分別有成五十六歲同六十三歲，於是被質疑同後生仔脫節，甚至搞嘅活動未能切合青年需要。佢哋任期將會喺明年三月底屆滿，加上佔領行動一役，令當局深深明白到青年政策嘅重要性，希望兩個委員會日後可以搞多啲符合青年人口味嘅活動。

據聞當局近日積極物色兩個委員會嘅下屆主席人選時，有意搵同青年人「有偈傾」嘅人做新主席。由於啟剛已係青年事務委員會委員，加上佢年紀唔算太大，所以由佢接任主席，亦尚算合理。至於公民教育委員會，當局有意搵啱啱退下火線嘅楊立門接任主席，消息話雖然楊立門年紀有番咁上下，但由於佢喺政府任職多年，對各項政策非常熟悉，加上佢外表尚算後生，相信容易被外界接受，令委員會日後工作不致於太過離地。

此外，聽聞民政局局長曾德成早喺佔領行動發生時，已透過青年議會約佔領者傾偈，了解佢哋諗法。佔領行動結束後，佢又再約咗另一批後生仔，收集佢哋對政府施政嘅意見。但青年喺會上都係表達對政改不滿，並非關心難買樓、升職等問題。如果當局真係有心解決青年問題，就真係唔好再「落錯藥」、射歪隔籬嘞！