有「三點不露」之稱嘅立法會金融界前議員李國寶霸住議席二十七年,出席率低,又少提質詢,最終被有關方面下令「退休」,所以先至由前選舉委員會界別嘅「星爺」吳亮星重出江湖。

不過,星爺表現差強人意,尤其係幾個月前財委會審議新界東北發展前期撥款期間,被泛民主派圍插,連建制都有怨言。近期金融界就傳出有人希望下屆易將,仲傳李國寶有意叫大仔李民橋接棒。

業界稱星爺表現一般

立法會眾多功能界別中,如果話要代表香港呢個國際金融中心,一定係金融界。不過,聽聞一眾金融界人士都對星爺評價一般,覺得佢作風舊派,完全無「賓架」外形,尤其係一眾外資銀行,更加不滿星爺只聽命於北京,完全無幫業界出頭。

有見及此,聽聞東亞銀行主席李國寶有意嚟一招「隔代傳位」,密謀叫阿仔李民橋接掌金融界議席,穩固李家江山。

其實一二年李國寶退位時,已經傳出呢個消息,但當時金融界覺得李家把持議席太耐,希望有啲新作風,可惜現時星爺搞唔起,仲成為建制派負累,反而益咗李家密謀翻盤,相信事前無人估得到。不過,除咗李民橋外,唔知仲有冇其他選擇呢?

第一手消息請下載on.cc東網iPhone/iPad/Android/Windows Phone Apps