政壇：高官赴廣華頌歌報佳音
就嚟又到聖誕節，東華三院同兒童發展配對基金一如往年舉辦「聖誕頌歌節」活動，東華三院主席施榮恆同多名董事局成員尋日就去到廣華醫院，為醫護人員唱聖誕歌打氣，又入兒科同婦產科病房大派禮物。呢個活動已經舉辦第五屆，今年仲邀請到最近因自願醫保而忙到抖唔到氣的食物及衞生局局長高永文，與醫護人員同病人慶祝聖誕節。
施榮恆（前右三）聯同高永文（前左三）向廣華醫院醫護人員及病人送暖。
啱啱公布自願醫保諮詢文件嘅高永文，尋日聯同副局長陳肇始、政治助理陳凱欣等組成「聖誕頌歌隊」，聯同公務員合唱團，一齊去到廣華醫院，同醫院員工組成嘅「Band One」樂隊夾Band，高唱三首聖誕歌為醫護人員打氣。對於假期要留院唔能夠同家人過節嘅病人，亦都可以喺醫院過一個暖笠笠嘅聖誕節。
