政壇：一舊雲亂搖B畀阿王寸

話說立法會尋日繼續審議男士三日有薪侍產假條例草案，白鴿黨「一舊雲」黃碧雲提出修訂，要求將侍產假由三日改為七日，並要求僱主支付全薪。為咗演說更加逼真，一舊雲甚至抄工聯會「阿王」王國興條橋，帶埋個BB公仔道具出席會議，但佢就捉住BB公仔隻腳係咁搖，嚇到阿王要向佢示範點先係正確抱BB方法。

黃碧雲捉住BB公仔隻腳猛搖，搞到王國興要出手教佢應該點抱BB。

阿王話正確抱BB嘅方法，應該係先要用手臂傍住個B，另一隻手臂則要托住BB個頭，以保護BB嘅脊骨同頸骨。聽到阿王寸佢唔識抱BB，一舊雲即時提出規程問題，要求代主席Andrew梁君彥裁決阿王教人抱BB同討論緊嘅修正案有乜嘢直接關係？

雖然Andrew叫阿王停止發表同修正案無關嘅言論，但阿王繼續寸爆一舊雲抱BB係一個唔好嘅示範，所以佢先要對睇直播嘅市民作出溫馨提示，提醒佢哋點先至係正確抱BB嘅方法。見到阿王唔理Andrew裁決繼續發言，一舊雲即時提出申訴，點知Andrew都覺得阿王言之有理，叫大家唔好學一舊雲咁抱BB喎。