政壇：阿Ann倡向港B派錢

不過，據聞前晚實在笑料百出，唔少建議都係天馬行空，最特別一定係建仔嘅Ann蔣麗芸，佢建議每名出世嬰兒可獲政府派發一萬元，然後每年派一次，直到十八歲為止，到成年就可以一次過提取十八萬元，阿Ann深信呢個建議可以幫班後生仔買樓喎。

阿Ann話依家唔少學生為咗讀大學，向政府借落一大筆債，所以先向鬍鬚曾建議設置呢個「嬰兒基金」，每名有香港身份證嘅小朋友一出世就獲派一萬元，一路派到十八歲。阿Ann仲話呢個計劃主要係幫年輕人儲蓄，所以成年後先可以動用筆錢，到時點用就自己話事，唔怕被父母攞去做其他嘢。

「保守計年派100億」

每人每年有一萬元，依家香港每年大約有四萬名嬰兒出世，咁咪好大筆錢？阿Ann話保守計過，政府每年最多只係畀一百億元，對政府嚟講濕濕碎啦！不過，現時香港地通脹猛於虎，銀紙大幅貶值，十八年後攞住十八萬元，仲可以做啲乜嘢呢？可能到時連十個階磚嘅空間都買唔到。阿Ann呢個建議，可能要再諗諗先得嘞！

睇嚟阿Ann都係為咗依家年輕人上樓難，諗條橋出嚟消下年輕人對政府嘅怨氣。不過，聽聞前晚阿Ann提出呢個建議時，鬍鬚曾即刻望住同枱嘅建仔主席譚耀宗，然後譚耀宗就以一副冷面笑匠話，呢個係阿Ann個人意見，同個黨無關呀！唔知阿Ann聽完後，有無嬲嬲豬呢？