民航官僚亂入貨 妹仔大過主人婆
「一件污，兩件穢，三件冇所謂」，民航處嘅醜聞愈揭愈多，愈揭愈臭，稍有廉恥嘅人都會無地自容喇，偏偏民航處處長羅崇文面皮特別厚，仲繼續死撐，擺出一副冇乜所謂咁款，唔到你唔服。
講起就長篇咯，民航處嘅醜聞數極都數唔晒，除咗將民航處大樓變成私人王國，要幾豪有幾豪，仲枉花巨額公帑購入一套睇得唔用得嘅空管系統添。件事係咁嘅，民航處一一年批出新空管系統合約，但冇幾耐就發現系統運作效率及安全出問題，需要斥巨資更改合約，啟用日期一拖再拖，搞到家陣都未用得，簡直荒謬。
咁仲唔止，民航處九六年明知機場有地理掣肘，仍花一億元採購精密跑道監察雷達，結果得物無所用，仲要額外花近二億元建塔樓安置雷達，妹仔大過主人婆。話時話，呢套雷達每年仲要花廿萬元維修保養，完全當公帑唔係錢，唔係敗家又係乜吖。
民航處洗腳唔抹腳，立法會政府帳目委員會梗係要公審羅崇文喇。不過咁，呢位仁兄出名厚顏，唔係賴三賴四，就係企圖「扮矮仔」蒙混過關。佢話喎，更改新空管系統合約係為咗符合國際民航組織推出嘅新指引，而且系統亦要兼容周邊地區嘅最新空管系統制式；至於當年無向立法會財委會交代跑道監察雷達嘅技術風險、地理掣肘及成本效益等問題，佢無可抵賴，只好認衰，聲稱會吸取教訓咁話。
嗱，解釋即係掩飾，認衰只不過係策略咋。正如有議員話齋，民航處為新空管系統做標書嗰陣，將技術評分比重定為四成，價格則為六成，完全冇將航空安全放到首位，家陣出咗事，冇根據合約追討損失不特止，反而向承辦商追加數千萬元修補系統，令系統「先平後貴」，點止辦事草率，直情係嚴重疏忽喇。仲有呀，民航處申請撥款採購跑道監察雷達時，一直冇向立法會財委會披露機場環境有掣肘，過咗海就係神仙，簡直就係蓄意隱瞞，家陣淨係認衰就算，邊有咁易過關吖。
講到呢度，大家一定會問，一個大花筒兼自把自為嘅庸官，點解有資格做處長呢？唔通香港真係冇人才成咁？咪話太一叮唔提醒，家陣內地全力反腐，老虎蒼蠅一起打，香港自詡廉潔城市、法治之區，當局仲唔撥亂反正，將浪費公帑嘅民航處庸官當蒼蠅咁拍，點對得住納稅人吖，叮！
