呢兩日，聽得最多嘅，係全港九流評論員探討「佔領運動」之得失成敗，最高嗰句，應係差人一哥話：「睇到今日（清場）成果，大家心中有數啦！」哦！心中有數！

我唔係事後孔明，而係一早已批死呢個「運動」total loss o架啦！

由一班滿口仁義道德嘅超大好人去「搞革命」？上魚蛋檔玩呀？對家係乜quali人馬呀？佢哋今劑係當推翻政權嘅「革命」看待呀！你班政治娃娃水兵仲口水花噴噴的做啲趕走無能鎮長咁低層次嘅玩意，點鬥呀？仲有呀！人家係用國家級政治鬥爭策略來開拖，呢度嘅抗爭者未團結已內鬥分裂互插，想贏？同差頭口頭禪一樣：「天方夜譚」囉！本屆特首之叻絕（嗱！我係說該說的真話咋！），乃佢係個極懂玩政治權術的人，近代中國，只得毛主席可媲，上屆煲呔曾自詡政治家？食蕉啦！梁先生之用計，硬將香港政改問題，提升到是中國主權內政級別，喺內地政局動盪時刻，又點會唔硬啃撐香港政府吖？

香港特區內，仲有好多人不認今劑運動失敗的！還畀出好多理由或前景，給自己「自我感覺良好」之用。

嗱！要知真正結論，好簡單的，勿再自我hit飛機，家陣，只須看看對手一群低質幫腔奴才的嘴臉及言詞，便知贏輸囉！那些囂張、得勢不饒人的賤話，經過一棚臭過屎坑的big mouth愈講愈意氣風發，到窮兇極惡地步，你哋仲有say嗎？

搞運動，贏唔到豬一樣嘅對手，係因為身邊全是神一樣愛心嘅隊友！

港豬！認命吧！阿門！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps