城中鏡：羅奇談婚論政 中美因利而合
【本報訊】摩根士丹利前亞洲主席、現職耶魯大學教授嘅羅奇尋日出席經濟論壇時竟然大談「婚姻」。佢形容中國同美國維持緊一段唔存在真愛，純粹因利而合嘅婚姻關係。一直以嚟，美國需要入口中國嘅廉價商品，而中國就要靠美國出口商品去刺激內地生產。
羅奇用婚姻比喻中美互利關係，話兩者之間唔存在真愛。
充滿危機及挑戰性
另外，中國鍾意儲錢，美國鍾意使錢，中國又可以不停借錢畀美國。中美兩國價值觀咁唔同，唔怪之得羅奇話中美雖然結婚三十年，但關係極唔穩定。一有問題嗰陣，大家就會責怪對方，佢又輕嘆話：「就好似現實生活中嘅婚姻咁。」總之，中美兩國呢段婚姻係充滿危機同挑戰性嘅。講到咁灰，睇嚟大師對婚姻睇化晒喎。
講完中美呢段婚姻後，羅奇大師本身嘅婚姻又點呢？然而，現年六十九歲嘅羅奇，佢就只提及自己太太係一位心理學家，相信，在場唔少聽眾都想知多啲啩！
