城中鏡：孫道弘 王梓軒籌備康奈爾150年校慶
【本報訊】前晚係美國康奈爾大學150周年晚宴，中港照相器材行政總裁Stanley孫道弘喺康奈爾畢業，取得學士同碩士學位，所以有份參與同籌備呢次活動，佢話：「一年前已經開始搵地方，學校呢個150周年慶典，除咗喺英國搞過之後，就到香港啦，所以今晚嘅嘉賓係由北京、新加坡、上海、越南同世界各地飛嚟，係一個國際盛會，同埋揀香港係因為呢度係東南亞中樞地區。」
孫道弘（左）與父母同賀母校150年慶典。
王梓軒特登編歌祝賀母校。
孫大倫新春後抱孫
佢爸爸、 Dennis孫大倫就透露當年有畀意見兒子修讀碩士課程，又話：「我當年有建議佢入我呢行，就叫佢去美國同日本嘅富士公司做嘢，再去考工商管理碩士，最後畢業之後就返嚟幫我手，做咗三年幾就開始take over我嘅工作，因為我覺得佢好成熟，所以佢依家係CEO，我係chairman。」係咪又抱多個孫？佢直認：「係啊，細新抱二月尾生啦，聽講係女，我覺得真係好有福氣，因為我有兩個仔，冇女，依家有三個孫女，我老婆好開心。」
藝發局主席王英偉嘅歌手兒子王梓軒都係校友，佢擔任活動主持同表演嘉賓，仲準備咗特別節目，佢話：「我會同依家讀緊呢間大學嘅學生合力演出，之前我編咗首曲，佢哋喺美國嗰邊錄嘅，一陣一路播，我就一路live表演，其實為呢個晚宴做嘅準備都驚險，因為我呢個月都飛好多，但又要不停覆email，不過都好感恩可以為學校做少少嘢。」
