城中鏡：佔鐘拖垮社企 張建宗開P打氣

雖然叫做聖誕派對，但張建宗就特別到會一隻燒豬，齊齊嚟個中式切燒豬儀式，唔知係咪金鐘政府總部重光後，想攞番個好意頭呢？佢仲話以後唔止聖誕節，總之局內同事凡有升遷、聚會或嫁娶買餅等都一定要佢哋幫襯社企喎，由於呢間社企餐廳僱用咗唔少智障員工，咁樣可以令佢哋感覺備受尊重同重視。

籲聘用長者及殘障人士

尋日到場歡聚嘅仲有副秘書長張美珠同陳羿、康復專員譚惠儀、社會福利署署長葉文娟同勞工處處長唐智強等，一大班同事逼爆餐廳，喺約短短一小時嘅聚會盡情食嘢玩遊戲抽獎，一完結就準時返回工作崗位，十分專業。餐廳經理鄭仕禎就多謝勞福局經常支持咁話。

講到飲食業難請人，市面上有洗碗工人薪金高達一萬五千元，接近經理級薪酬，但仍一人難求。張建宗就話呢啲只係表面情況，實際上洗碗工人工時較長，福利較少，所以僱主應從福利入手及擴闊招聘目標。佢話，現時好多六十五歲長者仍願意工作，可考慮聘用長者或殘障人士，並配合彈性工時，以兼職請人嘅機會相對大啲。