政壇：搞搞政：張國柱中西兼療 笑言治瘤有「三得」
早前都講過，立法會社福界議員「阿柱」張國柱喺一次絕食行動後，發覺體重不但冇回升，仲繼續減磅，於是去睇醫生做咗個詳細檢查，喺十月底證實患上惡性胃黏膜淋巴瘤，跟住佢向傳媒自爆患病，話接受醫生嘅建議，隨即向立法會請假兩個月接受治療同休養，當時佢仲強調話只係瘤唔係癌，叫大家唔使咁擔心添！
設計圖片及對白
隔咗一段時間，阿柱嘅狀況有冇好轉呢？佢話上月底完成咗二十四次放射治療，正等緊一連串嘅體檢，同時又有睇中醫師，食中藥固本培元，維持免疫力。佢自言依家身體狀況唔錯，仲有「三得」，就係每日都食得、去得同瞓得，三、四星期後會可能照胃檢查，再次多謝各方嘅關心。
久休復出連環曝光
自從證實患病後，阿柱一度較少公開現身，但事隔一個多月後，佢就「復出」兼頻頻曝光，包括早前趁雙學號召包圍添馬艦政府總部前夕，孭相機現身金鐘佔領區拍照留念，又如常出席扶貧委員會會議同立法會嘅相關會議，真係唔講都唔知佢身體不適，希望佢快啲好番晒！
