唔少家長都希望政府提供多啲學前教育嘅資助,而立法會研究落實免費幼稚園教育小組委員會尋日召開會議,教育局局長「吳得掂」吳克儉喺會上話,會參考免費幼稚園教育委員會嘅建議,資助半日制幼稚園教育,至於點樣為全日制同長全日制提供額外資助仲需要討論。有議員直指唔少讀全日制同長全日制幼稚園嘅學童,其家長係基層或雙職家長,或較半日制學童需要更多支援,質疑所謂免費幼稚園嘅定位模式屬「扶貧性」抑或「全港性」?

吳克儉

有議員仲質疑當局,「有啲想畀,有啲唔想畀,時間表傾到下任都未傾完,仲有資源問題,會攞幾多錢出來又無講。」佢又批評委員會嘅建議流於空洞,當局至今未清楚交代推行時間表同資源預算等問題,令人擔心。另有議員建議幼師「學位化」,以提升幼兒教育質素。立法會教育界議員葉建源又質疑,當局有意對幼稚園採用「一筆過撥款」資助模式,擔心可能會影響幼師薪酬同成個幼兒教育生態。

面對議員嘅質疑,吳得掂就話當局認為現階段預設資源上限,對委員會唔公平;至於推行時間表,會待委員會明年中提交整個建議報告後,再作全面諮詢,強調暫時未聽聞委員會討論採用「一筆過撥款」嘅資助模式建議。

第一手消息請下載on.cc東網iPhone/iPad/Android/Windows Phone Apps